I folketeljinga for Volda i 1865
var Ole Rønnestad omtala som steinarbeidar 23 år gammal.
Han var i ein gjeng med unge menn frå Volda som reiste rundt på
kysten og sette opp steinmurar på fyrstasjonar. Om lag
1870 kan ein seie at sunnmøringane delte oppsynet av fyr- og
merkevesen mellom seg. Ole A. Rønnestad hadde tidleg på
1870-talet ansvaret for oppsynet for Troms og Finnmark.
Dette gjekk på omgang, og i 1876 hadde Ole A. Rønnestad ansvaret
for området frå Lista til Stad. 1876 var det siste året
det vart brukt open båt i merkevesenet. I Volda vart det
bygt ei merkeskøyte som vart kalla "Fritjof". Ole A.
Rønnestad fekk gjennom at det skulle installerast eiga feltsmie
i båten. Seinare vart det bygt fleire merkeskøyter som
vart bemanna frå Volda. Ole A. Rønnestad var til liks med
Christian Malme fyrvaktar som var rekruttert frå stillinga som
fyrarbeidar. Ole A. Rønnestad var nok ikkje med på bygginga av
Ulla fyr, men derimot på Halten fyr i Nordland som vart bygt
samtidig med Ulla fyr.
Ole A. Rønnestad tok over som fyrvaktar etter Christian Malme i
1878. Dei første 9 åra han var fyrvaktar, var det framleis
berre fiskefyr på Kvernholmen. Rønnestad var der berre i
fisketida frå januar til april. Elles dreiv han med
oppsyns- og fyrarbeid langs kysten mellom anna på
merkefartøy. Rønnestad fekk etter kvart ein stor familie,
og familien budde i Volda så lenge Rønnestad hadde desse
funksjonane. Imidlertid vart det sett fram planar om å
gjere Ulla fyr om frå fiskefyr til kystfyr med funksjon heile
året, ein såkalla familiestasjon. Dette førte til at det
vart sett opp bustadhus, uthus, fjøs og naust på
Kvernholmen. Rønnestad heldt fram som fyrvaktar etter at
Ulla fyr fekk utvida funksjon, og han tok då med seg heile
familien sin frå Volda til Kvernholmen. Det var i 1887.
Då han og kona, Berte Rasmusdatter, kom til Ulla fyr, hadde dei
åtte born. Minstejenta, Berte Johanne Gurine, var ikkje
eingong årsgammal. Ei av jentene, Pernille Rasmine, som
var fødd i 1873, vart konfirmert i Haram kyrkje i 1888.
Den 9. august 1889 var det barnefødsel på Kvernholmen. Då
vart Margrete Elisabeth fødd og dei var 11 søsken.
Ole M. Andersson
Rønnestad f. 1843 d. 1899 var gift med Berte K.
Rasmusdt f. 1848
|
Barn:
|
Fødselsdato:
|
1
|
Anna Petrine
|
05.01.1869
|
2
|
Anders Johannes
|
24.05.1871
|
3
|
Pernille
Rasmine |
26.04.1873 |
4
|
Rasmus Olai |
05.08.1875 |
5
|
Martha
Canute |
27.07.1877 |
6
|
Peder
Andreas |
08.10.1879 |
7
|
Olaf
|
05.02.1882 |
8
|
Knud |
26.01.1885 |
9
|
Berte
Johanne Gurine |
16.01.1887 |
10
|
Margrete
Elisabeth |
09.08.1889 |
11
|
Johannes Zakarias
|
24.12.1890
|
Familien Rønnestad levde eit aktivt liv på Kvernholmen.
Det var ein svært musikalsk familie. Det blir fortalt at
dei hadde eige songkor der både born og vaksne var med.
Pernille, den eldste av borna, var dirigent for koret.
Ungane frå Ulla fekk også vere med når dei kom på vitjing til
Kvernholmen, og koret frå Ulla fyr brukte å underhalde på
tilstellingar på skulehuset på Ulla.
I denne tida var det eiga guvernante som tok seg av barnestell
og skuleundervisning for ungane på Ulla fyr. Det er
vanskeleg å tenkje seg korleis det kunne gå an å fungere som
familie på ein utpost som Kvernholmen med 8 ungar. Det var
ikkje mykje plass til kvar enkelt av dei 11 som budde der, og
med havet rundt på alle kantar var det ikkje direkte
ufarleg. Mange av dei daglege arbeidsoppgåvene var slett
ikkje lettvinte, og såleis måtte nok alle hjelpe til. Dei
små flekkane med jord vart dyrka opp, og kvar ein rutemeter og
kvart eit grasstrå vart utnytta. Det skulle gje for til
dyra som dei hadde, truleg ei ku og nokre sauer. Elles
hadde dei sjølvsagt havet som matfat rundt seg, mellom anna med
rett til å fiske laks.
Ole A. Rønnestad var fyrvaktar på Ulla fyr i 21 år, dei siste 12
åra med heile familien sin der ute etter at det vart
familiestasjon.
